سقى صوب الحيا مزن تهاما ** على قبر بتلعات الحجازي
يعط بها البختري والخزاما ** وترتع فيها طفلات الجوازي
وغنت راعبيات الحماما ** على ذيك المشاريف النوازي
صلاة الله ربي والسلاما ** على من فيه بالغفران فازي
عفيف الجيب ماداس الملاما ** ولا وقف على طرق المخازي
عذولي به عنيد مايراما ** ثقيل من ثقيلات المرا زي
ابو زرقا على خده علاما ** تحلاها كما نقش بغازي
عليه قلوب عشاقة تراما ** كسر مثل تكسير القزازي
ألا ياويل من جفنه علاما ** مضى له عن لذيذ النوم قازي
ومن قلبه الى هب النعاما ** يجرونه على مثل الخزازي
تكدر ماصفا ياما وياما ** صفا لي من تدانيه المجازي
ليالي مشربي صفو المداما ** وثوب الغي منقوش الطرازي
مضى بوصالها خمسة عواما ** وعشر كنها حزاة حازي
بفقدي له ووجدي والغراما ** تعلمت النياحه والتعازي
وصرت بوحشة من ريم راما ** ومن فرقاه مثل الخاز بازي
عذولي في هواها بالملاما ** يعزيني وأنا ما نيب عازي
وكل البيض عقبه لو تساما ** فلا والله تسوى اليوم غازي
سلينا لا حلال ولا حراما ** عليهن الطلاق بلا جوازي
حياة الشوق فيها والهياما ** وقد منه يهتز اهتزازي
وخد تم به بدر التماما ** وجعد فوق منبوز العجازي
فلا بي عقبها زاد ولا ما ** وجزت من الغوى والغي جازي
وخضت بحور ليعات تطاما ** خلاف الخل ما أدري وين بازي
نكيف الهم في قلبي تراما ** وجيش البين بالغزوان غازي
اريده وانكسر كسر السلاما ** بسيف جرده ما هوب هازي
على بخت الدهر ليته تعاما ** عفا عنها وليته ما يوازي
وليتني حلمت بها وياما ** بكيت لها وفي قلبي حزازي
اظل مساقم دوم الدواما **همومي فيه تنحاز انحيازي
الا يالله يامن بالملاما ** يسلم يوم ترزاه الروازي
أسلم له ولا رد السلاما ** عزيز من عزيزات اعزازي
وصلاة مني والسلاما ** على قبر بتلعات الحجازي